Déier vermësst! Wat elo?
Animal perdu / Quoi faire?
Hannerloosst ee Message op eisem Repondeur oder fëllt eise SOS Kontaktformulaire aus a mir setzen eis schnellstméiglech mat Iech a Verbindung!
Laissez-nous un message vocal sur notre répondeur ou remplissez notre formulaire de contact SOS et nous reviendrons vers vous dans les plus brefs délais.
Wat maachen wann den Hond fortgelaf ass?
Egal wéi gutt een oppasst, et ka jiddferengem passéieren dass de Mupp entwutscht oder sech lassrappt.
Ganz wichteg: op der Plaz bleiwen, wou der den Hond fir d’läscht gesinn hutt! Wann en net weit vun doheem fortgelaf ass, eng Persoun bieden bei Iech doheem ze waarden.
Wann e vun doheem fortgelaf ass, Gaardendier, Garage, etc oploossen, dem Hond d’Méiglechkeet ginn eran oder op den Terrain ze kommen.
Wann en no e puer Stonnen nach net zeréck ass:
- Police kontaktéieren
- Fierschter kontaktéieren
- an den Déierenasyler nofroen
- kontrolléiert op den Chip korrekt registréiert ass: www.europetnet.com
- meld d’Déier bei Tasso an/oder ID Chips als vermësst
- kontaktéiert eis fir weider Moossnamen ze beschwätzen
Net panikéieren, net kräiz a quier duerch d’Géigend lafen, och net ganz Suchmannschafte lassschécken!
Den Hond ass a Panik a leeft just nach weider fort wann en sech verfollegt fillt. Doduerch dass en a Panik ass, erkennt e meeschtens och net seng eege Leit, mee flücht virun allem wat en héiert.
Social Media ass eng gudd Hëllef fir op e vermësstent Déier opmierksam ze maachen. Schéckt eis eng Foto a mir erstellen e Visuell fir eng Vermësstmeldung op eisen Social Media Kanäl ze verbreeden.
Wéini ass den Asaz vun engem Sichhond sënnvoll?
Net ëmmer mëscht den Asaz vun engem Sichhond Sënn, dofir entscheede mir dat individuell bei all Fall.
E puer entscheedent Kriteren si folgend:
- d’Lengt hängt nach drunn an den Hond kann doduerch festhänken
- et ass nach e Welpen
- et ass en aalen, kranken oder blannen Hond
- den Hond ass schwéier verletzt oder brauch iwwerliewenswichteg Medikamenter
Bei Angschthënn an Hënn déi fräi laafen, ass et meeschtens net sënnvoll en Sichhond anzesetzen, well d’Gefoer dass den Hond weidergedriwwen oder verdriwwe gëtt, an vläicht doduerch souguer op eng Strooss oder Zuchschinnen leeft, immens grouss ass.
Mir entscheeden am Team ob en Asaz sënnvoll ass oder aner Moossnamen éischter zum Erfolleg féieren.
Wéi sécheren ech de Geroch vu mengem Déier?
Am Fall vun engem Sichhënnasaz brauche mir vun ärem Hond eng Gerochsprouf. Wat sech do eegent, beschwätzt Dir am bäschten direkt um Telefon mat eis.
Mee och wann ären Hond net fortgelaaf ass, kënnt dir awer sécherheetshalber esou eng Gerochsprouf vun ärem Hond hierstellen.
An eisem OnlineShop fannt Dir eise Gerochsëcherung-Set an deem alles dran ass wat dir braucht mat enger Anleitung an 3 Sproochen!
An dir ënnerstëtzt beim Kaf d’Sichhënn mat engem klengen Don!
Natierlech kënnt Dir och alles selwer zesummestellen!
Dir braucht pro Hond(!): steril Einweghändschen, steril Kompressen, 1 neit sterilt Amachglas mat Schrauwverschluss
Alles prett leeën, Händschen undoen, dem Hond mat der Kompress gutt duerch d’Schnëss, an d’Ouren, iwwert de Kapp lanscht de Kierper fueren. Dann d’Kompress an d’Glas a wa méiglech nach e klenge Putsch Hoer dobei. NET d’Hoer aus der Kämmbiischt oder vum Buedem huelen!!!
Numm vum Hond an Datum mat enger Etiquette oder waasserfestem Eding dropschreiwen. Ferdeg!
Op enger killer a liichtgeschützter Plaz lageren an all 6 Méint wiederhuelen!
Et ass ganz wichteg et genee esou ze maachen an och déi aner Hënn net un d’Glieser goe loossen! Soss besteet d’Gefoer dass awer déi verschidden Gerëch vermëscht ginn, wat eis Aarbecht am Fall vun engem Asaz extrem erschwéiert oder am schlëmmste Fall komplett onméiglech mecht.
Facebook Page:
Aktuell News & Posts vu vermëssten Déieren
